الحدق يفهم !

موضوع: الحدق يفهم ! الخميس أبريل 11, 2013 4:41 pm

كان عندي بيت ووقع واشتريت بيت تاني وجيت أشطبه سألت الناس مين احسن مقاول ف السوق قالولي في اتنين ف السوق الاولاني مش ملتزم بوقت اوي بس يعرف ربنا بس التزاماته نص نص ومواعيده مش مزبوطه والتاني مقاول عامل المطار بس وشاطر قلتلهم لاء انا مش عاوز الي عامل المطار انا عاوز مقاول على قدي ويلحقني

خلاص مضيت معاه عقد وخد عربون وغبت خمس ايام ورجعت لاقيتو عاممل الريسيبشن بلون تاني قلتله لاء دا مش اللي انا وانتا اتفقنا عليه واتخنقت معاه قالي لاء لاء انا عملت اللون ده بااغلبية الصناعيه .. قلتلو انا عايز لون فاتح يدي براح .. قالي مش هينفع قفشت منه ورحت قعدت ازعق قدام البيت , راح لم الصناعيه وقاعد يخطب فيهم سابني قدام البيت ومعبرنيش

اتجننت ورحت اشتكي لكل الناس رحت لبتاع الكرانيش ف السقف قلتلو ينفع كده ؟ قالي مش عاجبك روح كندا . . سالت بتاع الصحي المواسير متركبه غلط وهنروح ف داهيه .. قالي لو حصل حاجه قول يامقاولااااه وهتلاقي كل حاجه زبطت وزي الفل ,حتى في راجل وقور كده رحت اساله اقلو يامولانا ينفع كده قالي دا عشان انتا مشاركتش ف الانجاز , ورحت لصانعي منهم كنت بحبه قلتلو ينفع كده .. قالي انا سعيد جدا باللي بيحصل دهوسعيد بالسؤال ده

قلتلهم مش هينفع كده انا عايز العربون بتاعي .. قام الصناعيه قالو لالا عربون ايه بس , راحو عامليين قدام البيت مظاهره وسموها جمعة حمايه العربون .. قلتلهم انا ماضي عقد .. قالولي احترم العقد .. قلتلهم احترموا انتو العقد.. انا وانا بمضى العقد مخدتش منكو ضمنات غير الضمنات الشفويه بس خدت منكو عهود وانتو معملتوش بيها انا معترض على اللي بيحصل ده وعلى انكو منفزتوش الوعود .. قالولي الاعتراض مظهر صحي .. قالولي ارفع قضيه , رفعت قضيه حددتها جلسه الخميس .. طبقوا تلات واربع وخميس .. قفلوا البيت .. بس قفلو البيت ع مزاجهم وعملوه كله شبابيك اي حد يقدر يدخل البيت

وخلصت القصه على ان انا لسه ف الشارع وخناقات وخلافات وتطلعلي ناس تقلي ياريتك كنت خدت المقاول الاولاني .. قلتلهم الاولاني زي التاني مفرقوش عن بعض لان الاولاني ليه جماعته بردو لان التاني اللي انا اشتغلت معاه عمل اللي كان بيقول عليه المقاول الاولاني

الاختيار دلوقتى بقا الي حطنهولي يا اما اخد الاوضه
اللي ف الروف ع السطوح ياما الاحتكام بقا لصندوق البريد

انا عاوز ارجع العربون ياناس

قصه راقت لي جداً من واقع الحياة المسيطر على الساحة المصرية
مستوحاه من الكاتب الساخر عمرو طاهر بعنوان الحدق يفهم !
يا ترى فهمتوا مثل ما انا فهمت ؟!

تح

ياتي
ميريهان